ಮನೆಗೆ ಯಾವ ಗಣಪತಿ ಶುಭ..? ಬಲಮುರಿಯೋ ಅಥವಾ ಎಡಮುರಿಯೋ..?

ಹಿಂದೂ ಧರ್ಮದಲ್ಲಿ ಗಣಪತಿಯು ಪ್ರಥಮ ಪೂಜಿತ ದೇವರು. ಯಾವುದೇ ಶುಭ ಕಾರ್ಯ ಮತ್ತು ಪೂಜೆಯನ್ನು ಪ್ರಾರಂಭಿಸುವ ಮೊದಲು ಗಣೇಶನನ್ನು ಪೂಜಿಸಲಾಗುತ್ತದೆ. ಗಣೇಶನನ್ನು ಪೂಜಿಸುವುದರಿಂದ ನಮ್ಮ ಕೆಲಸದಲ್ಲಿ, ಜೀವನದಲ್ಲಿ ಎದುರಾಗುವ ಎಲ್ಲಾ ರೀತಿಯ ಬಿಕ್ಕಟ್ಟುಗಳನ್ನು ದೂರಾಗಿಸುತ್ತಾನೆ. ಆದರೆ, ಎಲ್ಲಾ ರೀತಿಯ ಗಣಪತಿ ವಿಗ್ರಹವನ್ನು ಪೂಜಿಸುವುದು ಸೂಕ್ತವಲ್ಲ. ಅದರಲ್ಲೂ, ಗಣಪತಿ ಪೂಜೆಯಲ್ಲಿ ಸೊಂಡಿಲಿಗೆ ಸಂಬಂಧಿಸಿದಂತೆ ವಿಶೇಷ ನಿಯಮವಿದೆ. ಸಾಮಾನ್ಯವಾಗಿ ದಕ್ಷಿಣಾಭಿಮುಖ ಸೊಂಡಿಲನ್ನು ಹೊಂದಿರುವ ಗಣೇಶನ ವಿಗ್ರಹವನ್ನು ಮನೆಯಲ್ಲಿ ಇಡುವುದಿಲ್ಲ. ಅದನ್ನು ದೇವಸ್ಥಾನದಲ್ಲಿ ನಾವು ನೋಡಬಹುದು. ದಕ್ಷಿಣಾಭಿಮುಖ ಮತ್ತು ಉತ್ತರಾಭಿಮುಖ ಗಣಪತಿ ವಿಗ್ರಹದಲ್ಲಿ ಯಾವುದನ್ನು ಪೂಜಿಸಬೇಕೆಂಬುದನ್ನು ಇಲ್ಲಿ ನೋಡೋಣ.

ಗಣೇಶನ ಸೊಂಡಿಲಿನ ಬಗೆಗಿರುವ ನಂಬಿಕೆಗಳು:
ಗಣೇಶನನ್ನು ದಕ್ಷಿಣಾಭಿಮುಖ ಮತ್ತು ಉತ್ತರಾಭಿಮುಖ ಎಂದು ಎರಡು ವಿಧಗಳಲ್ಲಿ ಪೂಜಿಸಲಾಗುತ್ತದೆ. ದಕ್ಷಿಣಾಭಿಮುಖ ಗಣಪತಿಯ ವಿಗ್ರಹವನ್ನು ಮನೆಯಲ್ಲಿಟ್ಟು ಪೂಜೆ ಮಾಡುವುದಿಲ್ಲ. ಯಾಕೆಂದರೆ, ಇದನ್ನು ಮನೆಯಲ್ಲಿ ಇಡುವುದು ಶುಭವಲ್ಲ ಎನ್ನುವ ನಂಬಿಕೆಯಿದೆ. ಆದರೆ, ದಕ್ಷಿಣಾಭಿಮುಖ ಗಣೇಶನ ವಿಗ್ರಹವನ್ನು ನಿಯಮಾನುಸಾರ ಪೂಜಿಸುವುದರಿಂದಲೂ ಶುಭ ಫಲಗಳು ದೊರೆಯುತ್ತವೆ. ದಕ್ಷಿಣಾಭಿಮುಖ ಸೊಂಡಿಲನ್ನು ಹೊಂದಿರುವ ವಿಗ್ರಹವನ್ನು ಸರಿಯಾಗಿ ಪೂಜಿಸಿದರೆ, ಅದು ಬಯಸಿದ ಫಲಿತಾಂಶಗಳನ್ನು ನೀಡುತ್ತದೆ. ಆದರೆ, ಇದನ್ನು ಪೂಜಿಸುವುದು ವಿಧಿ – ವಿಧಾನ ಬಹಳ ಮುಖ್ಯ. ಆ ವಿಧಾನದ ಬಗ್ಗೆ ನಾವಿಂದು ತಿಳಿದುಕೊಳ್ಳೋಣ.

ಗಣೇಶನ ಇಂತಹ ವಿಗ್ರಹ ಬಹಳ ಮಂಗಳಕರ:
ಮನೆಯಲ್ಲಿ ಗಣೇಶನ ವಿಗ್ರಹವನ್ನು ಪ್ರತಿಷ್ಠಾಪಿಸುವಾಗ, ಗಣೇಶನ ಸೊಂಡಿಲು ಎಡಭಾಗದಲ್ಲಿ ಇರಬೇಕು ಎಂಬುದನ್ನು ನೆನಪಿನಲ್ಲಿಡಿ. ಅಂತಹ ವಿಗ್ರಹವು ಮನೆಯಲ್ಲಿ ಸಕಾರಾತ್ಮಕತೆಯನ್ನು ಕಾಪಾಡುತ್ತದೆ ಮತ್ತು ಜೀವನದಲ್ಲಿ ಸಂತೋಷ ಮತ್ತು ಸಮೃದ್ಧಿಯನ್ನು ತರುತ್ತದೆ ಎಂದು ನಂಬಲಾಗಿದೆ. ಇನ್ನು ನೀವು ಮನೆಯಲ್ಲಿ ನೇರ ಸೊಂಡಿಲನ್ನು ಹೊಂದಿರುವ ಗಣೇಶನ ವಿಗ್ರಹವನ್ನೂ ಪೂಜಿಸಬಹುದು.

ಮನೆಯಲ್ಲಿ ಪೂಜಿಸುವ ಗಣೇಶನ ವಿಗ್ರಹದ ಸೊಂಡಿಲು ಯಾವ ರೀತಿ ಇರಬೇಕು..?
ಕೆಲವು ವಿಗ್ರಹಗಳಲ್ಲಿ, ಗಣೇಶನ ಸೊಂಡಿಲು ಎಡಭಾಗದಲ್ಲಿ ಮತ್ತು ಕೆಲವು ಬಲಭಾಗದಲ್ಲಿ ಇರುತ್ತದೆ. ಹೆಚ್ಚಿನ ಗಣೇಶನ ವಿಗ್ರಹಗಳು ನೇರವಾಗಿ ಅಥವಾ ಉತ್ತರದ ಕಡೆಗೆ ಸೊಂಡಿಲನ್ನು ಹೊಂದಿರುತ್ತವೆ. ದಕ್ಷಿಣಾವರ್ತಿ ಗಣೇಶನ ವಿಗ್ರಹವನ್ನು ಪೂಜಿಸುವುದರಿಂದ ನೀವು ಬಯಸಿದ ಫಲವನ್ನು ಪಡೆದುಕೊಳ್ಳುತ್ತೀರಿ. ನೇರವಾದ ಸೊಂಡಿಲು ಹೊಂದಿರುವ ಗಣೇಶನ ಮುಖವನ್ನು ನಾವು ಮೂರು ದಿಕ್ಕುಗಳಿಂದಲೂ ವೀಕ್ಷಿಸಬಹುದು. ಗಣೇಶನ ಸೊಂಡಿಲು ಬಲಕ್ಕೆ ತಿರುಗಿದ್ದರೆ ಅದನ್ನು ಪಿಂಗಳ ಸ್ವರ ಮತ್ತು ಸೂರ್ಯನಿಂದ ಪ್ರಭಾವಿತವಾಗಿದೆ ಎನ್ನುವ ನಂಬಿಕೆಯಿದೆ. ಈ ಬಲಮುರಿ ಗಣಪತಿಯನ್ನು ಅಡೆತಡೆಗಳ ನಾಶ, ಶತ್ರುಗಳ ನಾಶ, ವಿಜಯ ಪ್ರಾಪ್ತಿ, ಉಗ್ರತೆ ಮತ್ತು ಶಕ್ತಿ ಪ್ರದರ್ಶನದಂತಹ ಕಾರ್ಯಗಳಿಗೆ ಪೂಜಿಸಲಾಗುತ್ತದೆ.

ಎಡಕ್ಕೆ ಸೊಂಡಿಲು ತಿರುಗಿದ ಗಣೇಶನ ವಿಗ್ರಹವನ್ನು ಇಡಾ ನಾಡಿ ಮತ್ತು ಚಂದ್ರನಿಂದ ಪ್ರಭಾವಿತವಾದ ಗಣೇಶನ ವಿಗ್ರಹವೆಂದು ಪರಿಗಣಿಸಲಾಗುತ್ತದೆ. ಈ ಗಣಪತಿ ವಿಗ್ರಹವನ್ನು ಶಾಶ್ವತ ಕೆಲಸಗಳಿಗಾಗಿ ಪೂಜಿಸಲಾಗುತ್ತದೆ. ನೇರವಾದ ಸೊಂಡಿಲನ್ನು ಹೊಂದಿರುವ ಗಣಪತಿ ವಿಗ್ರಹವು ಸುಶುಮ್ನಾ ಧ್ವನಿಯನ್ನು ಹೊಂದಿದೆ ಎಂದು ಪರಿಗಣಿಸಲಾಗುತ್ತದೆ ಮತ್ತು ಅದರ ಆರಾಧನೆಯು ರಿದ್ಧಿ-ಸಿದ್ಧಿ, ಕುಂಡಲಿನಿ ಜಾಗರಣ, ಮೋಕ್ಷ, ಸಮಾಧಿ ಇತ್ಯಾದಿಗಳಿಗೆ ಅತ್ಯುತ್ತಮವೆಂದು ಪರಿಗಣಿಸಲಾಗಿದೆ. ಸಂತ ಸಮಾಜವು ಅಂತಹ ವಿಗ್ರಹವನ್ನು ಮಾತ್ರ ಪೂಜಿಸುತ್ತದೆ.

ಮನೆಯಲ್ಲಿ ಯಾವ ಗಣೇಶನ ವಿಗ್ರಹವನ್ನು ಪೂಜಿಸಬೇಕು..?
ಮನೆಯಲ್ಲಿ ಎಡಮುರಿ ಸೊಂಡಿಲಿನ ಗಣೇಶನ ಮೂರ್ತಿಯನ್ನು ಪ್ರತಿಷ್ಠಾಪಿಸುವುದರಿಂದ ಮನೆಯಲ್ಲಿ ಸುಖ, ಶಾಂತಿ, ಸಮೃದ್ಧಿ ನೆಲೆಸುತ್ತದೆ. ಮನೆಯ ವಾತಾವರಣವು ಸಕಾರಾತ್ಮಕವಾಗಿರುತ್ತದೆ ಮತ್ತು ಗಣೇಶನ ಆಶೀರ್ವಾದ ನಮ್ಮ ಮೇಲಿರುತ್ತದೆ ಎನ್ನುವ ನಂಬಿಕೆಯಿದೆ. ಅದೇ ರೀತಿ ಬಲಮುರಿ ಗಣಪತಿಯನ್ನು ಪೂಜಿಸುವುದರಿಂದ ಜೀವನದ ಅದೆಷ್ಟೇ ದೊಡ್ಡ ಸಮಸ್ಯೆಯಾಗಿದ್ದರೂ ಅದು ಕೊನೆಗೊಳ್ಳುತ್ತದೆ ಎನ್ನುವ ನಂಬಿಕೆಯಿದೆ. ಒಂದು ವೇಳೆ ನೀವು ಮನೆಯಲ್ಲಿ ಬಲಮುರಿ ಗಣೇಶನನ್ನು ಪೂಜಿಸಲು ಬಯಸಿದರೆ ತಜ್ಞರನ್ನು ಸಂಪರ್ಕಿಸಿ ನಂತರ ಪೂಜಿಸಬೇಕು. ಏಕೆಂದರೆ, ಈ ಮೂರ್ತಿಯ ಪೂಜೆ ವಿಧಿ – ವಿಧಾನಗಳು ಉಳಿದೆಲ್ಲಾ ಗಣಪತಿ ವಿಗ್ರಹದ ಪೂಜೆ ವಿಧಿ – ವಿಧಾನಗಳಿಗಿಂತ ಭಿನ್ನವಾಗಿರುತ್ತದೆ.

ಬಲಮುರಿ ಗಣಪತಿ ವಿಗ್ರಹವು ಸೂರ್ಯನ ಶಕ್ತಿಯಿಂದ ಪ್ರಭಾವಿತವಾಗಿದ್ದರೆ, ಎಡಮುರಿ ಗಣೇಶನ ವಿಗ್ರಹವು ಚಂದ್ರನ ಶಕ್ತಿಯಿಂದ ಪ್ರಭಾವಿತವಾಗಿರುತ್ತದೆ. ಇನ್ನು ನೀವು ಮನೆಯಲ್ಲಿ ನೇರ ಸೊಂಡಿಲಿರುವ ಗಣಪತಿ ವಿಗ್ರಹವನ್ನು ಕೂಡ ಪೂಜಿಸಬಹುದು. ಆದರೆ, ನೀವು ಮನೆಯಲ್ಲಿ ಯಾವುದೇ ಗಣಪತಿ ವಿಗ್ರಹವನ್ನು ಪ್ರತಿಷ್ಠಾಪನೆ ಮಾಡುವ ಮುನ್ನ ಪಂಡಿತರ ಸಲಹೆಯನ್ನು ತೆಗೆದುಕೊಳ್ಳುವುದು ತುಂಬಾನೇ ಅವಶ್ಯಕ.🙏